നിയോമിൽ 'ഒഴുകുന്ന വ്യവസായ നഗരം' സ്ഥാപിക്കാനൊരുങ്ങി സൗദി അറേബ്യ

ജിദ്ദ: നിയോമിൽ 'ഒഴുകുന്ന വ്യവസായ നഗരം' സ്ഥാപിക്കാനൊരുങ്ങി സൗദി അറേബ്യ.ലോകത്തെ ഏറ്റവും വലിയ ഫ്ലോട്ടിങ്​ വ്യവസായ നഗരമാണ്​ 'ഓക്​സഗൺ' എന്ന പേരിൽ സൗദി വടക്കൻ അതിർത്തിയിലെ സ്വപ്​ന നഗരമായ 'നിയോമിൽ' നിർമിക്കുന്നത്​. കിരീടാവകാശിയും നിയോം ഡയറക്ടർ ബോർഡ് ചെയർമാനുമായ അമീർ മുഹമ്മദ് ബിൻ സൽമാൻ ' നിയോമിൽ 'ഓക്​സഗൺ' നഗരത്തിന്റെ പ്രഖ്യാപനം നടത്തി​.

പുതിയ വ്യവസായ നഗരം ലോകത്തിലെ ഏറ്റവും വലിയ ഒഴുകുന്ന​ വ്യവസായ സമുച്ചയവും സൗദിയുടെ സാമ്പത്തിക വളർച്ചക്കും വൈവിധ്യവത്​കരണത്തിനും ഉത്തേജകവും ആകുമെന്നും കിരീടാവകാശി ചൂണ്ടിക്കാട്ടി .ദേശീയ സാമൂഹിക സാമ്പത്തിക പരിഷ്​കരണ പദ്ധതിയായ 'വിഷൻ 2030'-െൻറ ലക്ഷ്യങ്ങൾ കൈവരിക്കാനുള്ള വിവിധ പദ്ധതികളുടെ ഭാഗമാണിത്​​. ഭാവിയിൽ മനുഷ്യരാശിയുടെ ജീവിതവും പ്രവർത്തന രീതികളും പുനർനിർവചിക്കാൻ പോകുന്ന നിയോം നഗരത്തിന്റെ തന്ത്രജ്ഞതയ്​ക്ക്​​ അനുസൃതമായി നിർമാണ കേന്ദ്രങ്ങൾക്ക്​ പുതിയ മാതൃക നൽകാനാണ്​ ഓക്​സഗണി'ലൂടെ അധികൃതർ ലക്ഷ്യമിടുന്നത്​.

ഇതിലൂടെ പുതിയ തൊഴിലവസരങ്ങൾ സൃഷ്​ടിക്കാനാകും . മേഖലയിലെ ആഗോള വ്യാപാര ഒഴുക്കിനെ പിന്തുണയ്ക്കുന്നതിനൊപ്പം പ്രാദേശിക വ്യാപാര മേഖലയിൽ രാജ്യത്തെ പിന്തുണയ്ക്കുന്നതിലും ഓക്​സഗൺ നഗരം പങ്കാളിയാകും.