ഹജ്ജ്: സൗദിയിൽ ആരോഗ്യ മാർഗ്ഗ നിർദ്ദേശങ്ങൾ പുറത്തിറക്കി

സൗദി അറേബ്യയിൽ  ഹജ്ജുമായി ബന്ധപ്പെട്ട ആരോഗ്യ മാർഗ്ഗ നിർദ്ദേശങ്ങൾ അധികൃതർ  പുറത്തിറക്കി. 18നും 60 വയസ്സിനും ഇടയിൽ പ്രായമുള്ളവർക്ക് മാത്രമേ ഹജ്ജിന് അനുമതിയുള്ളൂ. തീർത്ഥാടകരും ഹജ്ജ് സേവനത്തിനെത്തുന്നവരും രണ്ട് ഡോസ് വാക്സിനും സ്വീകരിച്ചിരിക്കണം. വിദേശ തീർത്ഥാടകർ സൗദിയിലേക്ക് പുറപ്പെടുന്നതിന് മുമ്പ് വാക്സിനും, പി.സി.ആർ പരിശോധനയും പൂർത്തിയാക്കണം.  കഴിഞ്ഞ വർഷത്തെപോലെ കർശനമായ കോവിഡ് പ്രോട്ടോകോൾ പാലിച്ച് കൊണ്ടായിരിക്കും ഈ തവണയും ഹജ്ജ്.
  
മക്കയിലേയും മദീനയിലേയും 60 ശതമാനം ആളുകളിലും വാക്സിൻ വിതരണം ചെയ്യും. ദുൽഹജ്ജ് ഒന്നിന് മുമ്പായി രണ്ട് ഡോസ് വാക്സിനും സ്വീകരിച്ച ആഭ്യന്തര തീർത്ഥാടകർക്ക് മാത്രമേ ഹജ്ജിന് അനുമതി നൽകുകയുളളൂ. ഹജ്ജുമായി ബന്ധപ്പെട്ട സേവനങ്ങളിലേർപ്പെടുന്നവർ ഹജ്ജ് സേവനമാരംഭിക്കുന്നതിന് രണ്ടാഴ്ച മുമ്പെങ്കിലും വാക്സിന്‍റെ രണ്ട് ഡോസും സ്വീകരിച്ചിരിക്കണം. വിദേശ തീർത്ഥാടകർ സൗദിയിലെത്തുന്നതിന് ഒരാഴ്ച മുമ്പ്, ലോകാരോഗ്യ സംഘടനയുടെ അംഗീകാരമുള്ള വാക്സിൻ സ്വീകരിച്ചിരിക്കണമെന്നുമാണ് ചട്ടം. മാത്രവുമല്ല, സൌദിയിലെത്തുന്നതിന് 72 മണിക്കൂർ മുമ്പെടുത്ത പി.സി.ആർ നെഗറ്റീവ് പരിശോധന ഫലം ഇവർ കയ്യിൽ കരുതണം. സൗദിയിലെത്തിയാൽ 72 മണിക്കൂർ ക്വാറന്‍റൈൻ പൂർത്തിയാക്കുകയും, ഇതിൽ 48 മണിക്കൂർ പൂർത്തിയാകുമ്പോൾ വീണ്ടും കോവിഡ് പരിശോധന നടത്തുകയും വേണം.