ശ്വാനസേനയ്ക്ക് കരുത്തു പകരാൻ 23 നായ്ക്കൾ; പാസ്സിംഗ്‌ ഔട്ട് ഇന്ന്
കേരള പോലീസിൻ്റെ കെ 9 ഡോഗ് സ്ക്വാഡിന് കരുത്തേകാൻ പുതിയ 23 നായ്ക്കുട്ടികൾ. ബെൽജിയം മാലിനോയ്‌സ്‌, ജർമൻ ഷെപേഡ്‌, ഗോൾഡൻ റിട്രീവർ, ഡോബർമാൻ, ലാബ്രഡോർ ഇനങ്ങളിൽപ്പെട്ട നായ്‌ക്കളാണ്‌ സേനയുടെ പന്ത്രണ്ടാം ബാച്ചായി കർമ്മനിരതരാകുന്നത്.ഫെബ്രുവരി 10ന് രാവിലെ 10ന് തൃശൂർ രാമവർമപുരം പൊലീസ്‌ അക്കാദമിയിൽ നടക്കുന്ന പാസിങ്‌ ഔട്ട് പരേഡിൽ ഡിജിപി അനിൽകാന്ത്‌ അഭിവാദ്യം സ്വീകരിക്കും. നായ്‌ക്കളുടെ 46 ഹാൻഡ്‌ലർമാരും സേനയുടെ ഭാഗമാകും. എഡിജിപി (പരിശീലനം) ആന്റ് ഡയറക്ടർ കേരള പോലീസ് അക്കാദമി ബൽറാം കുമാർ ഉപാധ്യായ, ഐജിപി (പരിശീലനം) സേതുരാമൻ, മറ്റ് മുതിർന്ന ഉദ്യോഗസ്ഥരും ചടങ്ങിൽ പങ്കെടുക്കും.
സംസ്ഥാന ഡോഗ് ട്രെയിനിംഗ് സ്‌കൂളിലെ 12-ാം ബാച്ചിലെ 23 നായ്ക്കളുടെയും അവയുടെ 46 ഹാൻഡ്‌ലർമാരുടെയും പരിശീലനം 2021 മാർച്ച് 19നാണ് ആരംഭിച്ചത്. 16 ബെൽജിയൻ മിലിയോണിസ് നായ്ക്കൾ, നാല് ജർമ്മൻ ഷെപ്പേഡുകൾ, ഒരു ഗോൾഡൻ റിട്രീവർ നായ, ഒരു ഡോബർമാൻ, ഒരു ലാബ്രഡോർ നായ എന്നിവയടങ്ങുന്നതാണ് 12-ാം ബാച്ച്. ഒമ്പതു മാസത്തെ തീവ്രപരിശീലനം കഴിഞ്ഞാണ്‌ 12 ആണും 11 പെണ്ണും അടങ്ങുന്ന ഈ ശ്വാന വീരന്മാർ ‘ഡ്യൂട്ടി’ക്ക്‌ കയറുന്നത്‌.
ആദ്യഘട്ടത്തിൽ 23 പേർക്കും ഒരുമിച്ചായിരുന്നു പരിശീലനം. തുടർന്ന്‌ പ്രത്യേക വിഭാഗമായി തിരിച്ചു. 14 നായ്‌ക്കൾക്ക്‌ സ്‌ഫോടക വസ്‌തുക്കൾ കണ്ടെത്തുന്നതിനും, അഞ്ചു നായ്‌ക്കൾക്ക്‌ കുറ്റകൃത്യസ്ഥലങ്ങളിൽനിന്ന്‌ തെളിവ്‌ ശേഖരിക്കുന്നതിനും പരിശീലനം നൽകി. മൂന്ന് നായ്‌ക്കൾക്ക്‌ നിരോധിത മയക്കുമരുന്ന്‌ കണ്ടെത്തുന്നതിനും, ഒരു നായക്ക്‌ പ്രകൃതി ദുരന്തപ്രദേശങ്ങളിൽനിന്ന്‌ മൃതദേഹങ്ങൾ കണ്ടെത്തുന്നതിനുള്ള (കവാഡർ) പ്രത്യേക പരിശീലനവുമാണ്‌ നൽകിയത്‌.
പരിശീലനം പൂർത്തിയാകുമ്പോൾ, സ്‌ഫോടകവസ്‌തുക്കൾ കണ്ടെത്തുന്നതിനുള്ള പരിശീലനം ലഭിച്ച നായ്‌ക്കളിൽ രണ്ടെണ്ണം ആലപ്പുഴ കെ–-9 സ്‌ക്വാഡിലേക്കും, ഓരോ നായ്ക്കളെ വീതം തിരുവനന്തപുരം സിറ്റി, റൂറൽ, തൃശൂർ സിറ്റി, റൂറൽ, കോഴിക്കോട്‌ സിറ്റി, റൂറൽ, കണ്ണൂർ സിറ്റി, റൂറൽ, കൊല്ലം സിറ്റി, എറണാകുളം റൂറൽ, കോട്ടയം എന്നീ കെ–-9 സ്‌ക്വാഡുകളിലേക്കും കൈമാറും.
ട്രാക്കർ വിഭാഗത്തിൽ പരിശീലനം ലഭിച്ച അഞ്ച് നായ്ക്കളെ കൊച്ചി സിറ്റി, പാലക്കാട്, കണ്ണൂർ റൂറൽ, ഇടുക്കി, തൃശൂർ സിറ്റി എന്നിവിടങ്ങളിൽ ഒന്ന് വീതവും നാർക്കോട്ടിക് ഡിറ്റക്ഷൻ വിഭാഗത്തിൽ പരിശീലനം ലഭിച്ച മൂന്ന് നായ്ക്കളെ തിരുവനന്തപുരം സിറ്റി, തിരുവനന്തപുരം റൂറൽ, കണ്ണൂർ റൂറൽ എന്നിവിടങ്ങളിൽ ഒന്ന് വീതവും കഡാവർ ഡിറ്റക്ഷൻ വിഭാഗത്തിൽ പരിശീലനം ലഭിച്ച നായയെ ഇടുക്കി കെ-9 സ്ക്വാഡിനും കൈമാറും